Am Samstig Morge hei sech aui vom U17 Team, zum Glück nid all zu früeh, am Bahnhof troffe. Mir sy mitm Zug über Züri nach Cham gfahre uh hei dört ner grad guet Zyt gha, für üüs um z`zieh uh ner es gäbigs Iiwerme z`mache. Üses erste Spiu hei mer gege Freespeed gha. Das Spiu hei mer gwunne uh sy ner mitemne liecht mulmige Gfüuuh im Mage gege d Phanters ufem Feud gstande. Aber oh dä cool uh intensiv Match gege di andere Bärner hei mer gwunne. Z letschte Spiu am Samsti hei mer gege d Crazy Whelps gspiut. Trotz dä müede Bei vo dem Tag uh de verschiednigschte Chrämpf (ja oh am Chinni chame eh Chrampf ha...) hei mer oh dä Match gwunne. Am Abe hets mega feini Teigwahre gä uh übernachtet hei ner di Meischte im Bunker.
Am Sunntig hei mer ner recht glasse chönne ufstah, da mir ersch gäge Mittag üses erschte Spiu vom Tag, z zwöite Mau gege d Phanters, hei gha. Dä Match het eifch vom erschte Punkt bis zum letschte henne Spass gmacht uh är isch henne intensiv gsy. Dr Iitritt i Finau hei ner glych mir gschafft uh hei ner dert gäge d Crazy Whelps gspiut. Da mir zum Teil wurftechnisch ihne no chly überlege sy gsy hei mir der Outdoor-Schwyzermeischterschaftstitu zum 3. Mau in Foug chönne heitrage. Es isch es henneeh cools uh lustigs Wucheendi gsy. 🙂
Nora Köppel
